Surah al-Fatiha

تعارف سورۃ الفاتحہ

یہ مختصر لیکن حقائق اور معافی سے لبریز، دل آویز اور جلیل القدر سورت ہے جس سے مقدس آسمانی کتاب کا آغاز ہوتا ہے جس نے تاریخ انسانی کا رخ موڑ دیا، جس نے فکر و نظر میں انقلاب پیدا کر دیا، جس نے قلب وروح کو نئی زندگی بخش دی۔ اس پاک سورت کی گوناں گوں برکت کو کیونکر قلمبند کیا جاسکتا ہے؟ وہ متعدد نام جن سے نبی اکرم صلی اللہ تعالٰی علیہ وآلہ وسلم نے اس سورت کو یاد فرمایا ہے‘ حقیقت شناس نگاہوں کو ان ناموں کی برکات سے آشنا کردیں گے جو اس میں بڑی خوبصورتی سے سموئے گئے ہیں۔ ان ناموں میں سے چند درج ذیل ہیں:

الفاتَحہ: رحمت کے خزانے کھولنے والی

فاتحۃ الکتاب: قرآن حکیم کے سربستہ رازوں کی کلید

اُمّ القُرآن: حقائق قرآنی کا ماخذ ومنبع

السّبع المثانی: بار باردہرائی جانے والی سات آیتیں

الشّفآء: جسمانی اور روحانی بیماریوں کا تریاق

یہ سورہ پاک مکہ مکرمہ میں نازل ہوئی۔ اس کا ایک رکوع ہے، سات آیات، پچیس الفاظ اور ایک سو تیئس حروف ہیں۔