تعارف سورۃ الانفطار

اس کی پہلی آیت میں "انفطرت" کا کلمہ ہے جس کا مصدر ’انفطار‘ ہے یہی اس سورہ کا نام ہے۔ اس میں ایک رکوع، انیس آیتیں، اسی کلمے اور تین سو ستائیس حروف ہیں۔

نزول

یہ بھی مکی دور کے آغاز میں نازل ہونے والی سورتوں میں سے ایک ہے۔

مضامین

وقوع قیامت کا ہولناک منظر پیش کرنے کے بعد بتادیا کہ اس روز فریب کے سارے پردے چاک ہو جائینگے۔ حقیقت اپنی صحیح صورت میں نمایاں ہوجائے گی۔ ہر شخص کو خود بخود اپنے کارناموں کے بارے میں پتہ چل جائے گا کہ وہ دنیا میں کی اکرتا رہا؟ نیکی یا بدی کا جو بیج وہ بو آیا تھا اس کے اچھے یا برے کیا نتائج مرتب ہوئے؟

پھر انسان کو کہا جارہا ہے کہ اے انسان! جس رب کریم نے تجھے اپنے لطف وکرم کے آغوش میں پالا، اپنے بےپایاں احسانات سے نوازا۔ تم اسی کی ناشکری کر رہے ہو۔ تم یہ نہ سمجھو کہ تم جو کچھ کر رہے ہو وہ فراموش کردیا جائے گا اور روز محشر اس کا کوئی باضابطہ ثبوت پیش نہ کیا جاسکے گا۔ یہ تمہاری غلط فہمی ہے ایسا ہرگز نہیں ہوگا، بلکہ ہم نے معتبر فرشتے مقرر کردیے ہیں جو تیرے ہر فعل اور تیرے ہر جملہ کو ضبط تحریر میں لا رہے ہیں۔ اس قابل وثوق ریکارڈ کے مطابق نیکوں کو ان کی نیکی کا اجر اور بروں کو ان کی برائی کی سزا ملے گی۔