تعارف سورۃ النجم

اس سورۃ مبارکہ کا نام النجم جو اس کا پہلا کلمہ ہے۔ اس میں تین رکوع، باسٹھ آیتیں، 360 کلمے اور 1405 حروف ہیں۔

زمانہ نزول

حضرت حسن بصری، عکرمہ، عطاء، جابر اور دیگر علماء کے نزدیک یہ سورۃ مکہ مکرمہ میں نازل ہوئی۔ اس کے مدنی ہونے کا قول محض غلط ہے۔ حضرت ابن مسعود رضی اللہ تعالیٰ عنہ سے مروی ہے: ھی اول سورۃ اعلھا رسول اللہ صلی اللہ علیہ وآلہ وسلم بمکمۃ یعنی یہ پہلی سورۃ ہے جس کو حضور صلی اللہ علیہ وآلہ وسلم نے مکہ مکرمہ میں علانیہ مجمع عام میں پڑھ کر سنایا۔ جب آخری آیت کی تلاوت کے بعد حضور صلی اللہ علیہ وآلہ وسلم سجدہ ریز ہوئے تو سامعین پر محویت کا ایسا عالم طاری تھا کہ مومن اور مشرکت سب کے سب سجدے میں گر گئے۔ ان لوگوں میں وہ کافر بھی تھے جو قرآن سننا بھی گوارا نہ کرتے تھے، لیکن جب حضور صلی اللہ علیہ والہ وسلم نے حرم شریف میں اس کی تلاوت شروع کی تو اس کے اسلوب بلیغ نے ان کو یوں وارفتہ کردیا کہ مخالفت کے سارے منصوبے دھرے کے دھرے رہ گئے اور وہ اس کو سننے میں محو ہو گئے۔

سورۃ والنجم کے سال نزول کے بارے میں بعض مصنفین نے یہ لکھا کہ یہ سورت نبوت کے پانچویں سال ماہ رمضان میں نازل ہوئی اس کی دلیل انہوں نے یہ بیان کی ہے کہ یہ سورت جب نازل ہوئی تو حضور صلی اللہ علیہ وآلہ وسلم نے حرم شریف میں مجمع عام میں اس کی تلاوت فرمائی اور جب اس کی آخری آیت تلاوت کی فاسجد واللہ واعبدوا۔ یہ حضور نے بھی سجدہ کیا اور اس محفل میں مسلمان اور کافر جتنے حاضرین تھے سب سربسجود ہو گئے۔ اس سے یہ بات عام ہو گئی کہ تمام اہل مکہ مشرف باسلام ہو گئے ہیں۔ یہاں تک کہ یہ افواہ حبشہ میں ہرجت کر کے جانے والے مسلمانوں تک جا پہنچی جو ماہ رجب میں ہجرت کر کے وہاں پہنچے تھے، ان کی خوشی کی انتہاء نہ رہی۔ چنانچہ ان میں بعض تو حبشہ میں ہی سکونت پزیر رہے، لیکن بعض نے فیصلہ کیا جب اہل مکہ مسلمان ہو گئے ہیںتو ظلم و ستم کا دور ختم ہو گیا ہوگا، اس لیے جلاوطنی کی زندگی بسر کرنے کے بجائے ان کے لیے بہتر یہ ہے کہ وہ اپنے وطن واپس چلے جائیں چنانچہ وہ ماہ شوال میں مکہ پہنچے لیکن یہاں وہی کفرو شرکت کی ظلمت چھائی ہوئی تھی اور مسلمانوں پر حسب سابق ظلم و ستم کے پہاڑ توڑے جا رہے تھے۔ اب ان لوگوں کے لیے اس کے بغیر کوئی چارہ کار نہ رہا کہ وہ مشرکین میں سے کسی پناہ لے کر مکہ میں داخل ہوں یا اس طرح چوری چھپے اپنے شہر میں داخل ہوں کہ کسی کافر کو ان کی واپسی کی خبر تک نہ ہو۔ اس واقعہ سے ان مصنفین نے یہ نتیجہ اخذ کیا ہے کہ یہ سورۃ مبارکہ نبوت کے پانچویں سال ماہ شوال سے پہلے نازل ہو چکی تھی چنانچہ انہوں نے ماہ رمضان کو اس کے نزول کا مہینہ متعین کیا ہے لیکن اگر بنظر غائر دیکھا جائےتو یہ استدلال کئی وجوہ سے ناقابل اعتبار تسلیم ہے۔

اس سورت کے مضامین اس قول کی تردید کرتے ہیں کہ اس کا نزول بعثت کے پانچویں سال میں ہوا، کیونکہ اس کی ابتدائی آیتوں میں معراج النبی صلی اللہ علیہ وآلہ وسلم کا تذکرہ ہے۔ خصوصا عنہ سدرۃ المنتھیٰ عندھاجنۃالماویٰ۔ یہ دو آیتیں اس امر پر قطعی دلالت کرتی ہیں کہ اس سورت کے ابتدائی حصہ میں ان احوال کا بیان ہے جو سفر معراج میں پیش آئے کیونکہ علے اختلافات الرویات، وہاں جبرئیل امین کا دیدار ہو ہو یا رویت باری کا شرف حاصل ہوا ہو۔ یہ رویت بہرحال سدرۃ المنتہی کے مقام پر ہوئی اور سدرۃ المنتہی پر حضور صلی اللہ علیہ وآلہ وسلم کی معراج کی رات میں تشریف آوری ہوئی ہے اس سے پہلے نہیں ہوئی اور معراج کے بارے میں محدثین کا اتفاق ہے کہ یہ واقعہ ہرہجرت سے ایک سال یا ڈیڑھ سال قبل وقور پزیر ہا۔ اس سے پہلے نہیں ہوئی اور معراج کے بارے میں محدثین کا اتفاق ہے کہ یہ واقعہ ہجرت سے ایک سال یا ڈیڑھ سال قبل وقوع پزیر ہوا۔ اس لیے وہ سورت جس سے ایسا واقعہ مذکور ہے جو نبوت کے دسویں یا گیارہویں سال رونما ہوا۔ اس سورت کا نزول نبوت کے پانچویں سال میں کیونکر متصور ہو سکتا ہے۔ دوسری وجہ جو اس قول کی تردید کرتی ہے وہ یہ ہے کہ علامہ ابن ہشام نے اپنی سیرت کی شہرہ آفاق کتاب میں مہاجرین حبشہ کے حالات کو بڑی شرح وبسط کیساتھ بیان کیا ہے۔ حتیٰ کہ تمام مہاجرین کے اسماء اور ان کے قبائل کے نام بھی بالترتیب درج کیے ہیں۔ وہ آخر میں لکھتے ہیں۔

و بلغ رسول الله صلی الله تعالیٰ علیه وسلم الذین اخرجوا الی ارض الحبشه اسلام اهل مکه فاقبلوا لما بلغم من ذلک حتیٰ اذادنوا من مکه بلغهم ان ما کانواتحدثوابه من اسلام اهل مکه کان باطلا۔.

(سیرت ابن هشام، ص: 388، ج: 1)

یعنی رسول کریم صلی اللہ علیہ وسلم کے وہ اصحاب جو سرزمین حبشہ کی طرف ہجرت کر گئے تھے، یہ اطلاع ملی کہ اہل مکہ نے اسلام قبول کر لیا ہے۔ یہ سن کر وہ واپس لوٹے لیکن جب وہ مکہ کے نزدیک پہنچے تو انہیں معلوم ہوا کہ اہل مکہ کے مسلمان ہونے کی اطلاع جھوٹی تھی۔ اس روایت میں نہ تو لامہ مذکور نے یہ ذکر کیا ہے کہ حضور نے سورۃ النجم کی تلاوت کی اور اسے سن کر تمام کفار نے سجدہ کیا۔ اس وجہ سے یہ افواہ مہاجرین حبشہ کو ملی تھی اور نہ انہوں نے مہاجرین کی واپسی کے لیے نبوت کے پانچویں سال کے ماہ شوال کو تعیین کیا ہے۔ اگر یہ روایت قابل اعنتا ہوتی تو علامہ مزکور نے جب دیگر تمام تفصیلات کا احاطہ کیا تھا وہ ان دونوں چیزوں کا تذکرہ بھی ضرور کرتے۔

اس طرح امام احمد بن حبنل نے اپنی مسند میں حضرت امام المومین ام سلمیٰ رضی اللہ عنھا کے واسطہ سے ہجرات حبشہ کا مفصل حال نقل کیا ہے۔ اس میں بھی واپسی کے بارے میں سورۃ النجم کے نزول کا کوئی ذکر نہیں۔

امام بخاری رحمۃ اللہ علیہ نے حضرت ابن عباس سے یہ روایت نقل کی ہے جب سورۃ النجم نازل ہوئی تو حضور علیہ الصلوۃ والسلام نے حرم شریف کے صحن میں ایک مجمع عام کے سامنے اس کی تلاوت کی اور آیت سجدہ کی تلاوت کے بعد حضورنے خود بھی سجدہ کیا اور تمام حاضرین نے جن میں مسلمان، کافر، جن، انس سب شامل تھے۔ اس روایت میں نہ حبشہ کے مہاجرین کی واپسی کا ذکر ہے اور نہ پانچویں سال کا تذکرہ ہے۔

امام مسلم، ابوداود، نسائی اور دیگر مستند محدثین نے اس طرح کی روایات نقل کی ہیں۔ وہ روایت جس میں سورۃ النجم کی تلاوت اور تمام حاضرین کے سربسجود ہونے کے ساتھ سن 5 نبوی میں مہاجرین حبشہ کی واپسی کا بھی تذکرہ ہے۔ اس میں تلک الغرانیق العلےٰ، والے من گھڑت اور جھوٹے قصے کا بیان بھی ہے جس کی علماء محققین نے شدومد سے تکذیب بھی کی ہے اور عقلی و نقلی دلائل سے اس کی تردید بھی کی ہے۔ اس لیے وہ روایت قطعا اس قابل نہیں کہ اس پر اعتماد کرتے ہوئے سورۃ النجم کے نزول کے لیے نبوت کا پانچواں سال معتین کیا جائے۔

بیشک حبشہ میں یہ افواہ پھیلی تھی کہ اہل مکہ مسلمان ہو گئے ہیں لیکن اس کی وجہ یہ نہ تھی جو اس روایت میں بیان کی گئی ہے بلکہ اس کا باعث یہ امر تھا کہ ان کی مکہ سے روانگی کے بعد دو ایسی ہستیاں مشرف باسلام ہو گئی تھیں، جن کی قوت، شجاعت اور ہیبت سے سارا مکہ خائف اور ترساں رہتا تھا یعنی سیدنا حمزہ اور سیدنا فاروق اعظم رضی اللہ تعالیٰ عنھما نے اسلام قبول کرلیا تھا۔ ان کے مشرف باسلام ہونے سے مسلمانوں کی بے بسی اور بیکسی کا خاتمہ ہو گیا تھا۔ اب وہ کھلے بندوں حرم کعبہ میں عبادت کیا کرتے اور باجماعت نماز ادا کرتے اس خوش کن تبدیلی کے باعث یہ بات اردگرد کے قبائل میں پھیل گئی کہ اہل مکہ مسلمان ہو گئے ہیں اور یہ بات حبشہ کے مہاجرین نے بھی سنی۔ نیز حبشہ میں بھی خانہ جنگی کے شعلے بھڑکنے لگے تھے۔ حبشہ کے بادشاہ نجاشی کے خلاف آئے روز بغاوتیں شروع ہو گئی تھیں۔ ان وجوہات کے باعث مسلمانوں نے مکہ واپس آنے کا عزم کیا لیکن جب وہ مکہ پہنچے، تو یہاں حالات ان کی توقعات کے بالکل برعکس تھے، اس لیے ان میں سے جو وہاں کسی کی پناہ لیکر آرام  کی زندگی بسر کرسکتے تھے، وہ وہیں رک گئے اور اکثر حبشہ چلے گئے۔ شیخ محمد ابوزہرہ رحمۃ اللہ علیہ نے اپنی سیرت کی کتاب خاتم النبین میں اس افواہ کی ایک اور وجہ بھی تحریر کی ہے جو قرین قیاس ہے کہ عمروبن عاص جب نجاشی کو اس بات پر برانگجیتہ کرنے میں ناکام رہے کہ وہ مسلمانوں کو حبشہ سے نکل جانے کا حکم دیدیئے تو انہیں اپنی یہ ناکامی بہت گراں گرزی۔ انہوں نے یہ چال چلی کی اس خبر کو حبشہ میں کارندوں کے ذریعے مشہور کردیا کہ اہل مکہ مسلمان ہو گئے ہیں۔ ان کا مقصد یہ تھا کہ اس طرح مسلمان خود بخود اپنے چلے آئیں گے اور ہم ان کو دبوش لیں گے اور ظلم و ستم سے جس طرح چاہیں گے ان کا کچومر نکال دیں گے۔

بہرحال اس افواہ کے مشہور ہونے کی کوئی اور وجہ تو ہو سکتی ہے لیکن یہ وجہ ہرگز نہیں ہو سکتی جو اس روایت پر اعتماد کرنے والے مصنفین نے ذکر کی ہے۔

مضامین

اس سورت میں سب سے پہلے ان الزامات کی تردید کی گئی ہے جو کفار سرورعالم پر عائد کیا کرتے تھے کبھی کہتے یہ راہ راست سے بھٹک گئے ہیں بہکی بہکی باتیں کرتیں ہیں اپنی ساری قوم کی تکذیب کرتے ہیں اور جو کلام یہ پڑھ کر سناتے ہیں، اسے خود گھڑ لاتے ہیں اور اللہ تعالیٰ کی طرف منسوب کردیتے ہیں۔ پہلی آیتوں میں قسم اٹھا کر ان الزامات کی تردید فرما دی۔ ’ماضل صاحبکم و ما غویٰ ۔۔۔۔الخ‘

ساتھ ہی یہ بتا دیا کہ نہ یہ خود ان آتیوں کے گھڑتے ہیں اور نہ سنی سنائی باتیں کرتے ہیں۔ بلکہ جو ذات انہیں یہ کلام بلاغت نظام سکھاتی ہے۔ اس کا انہوں نے دیدار بھی کیا ہے۔ بات شنید تک محدود نہیں بلکہ دید تک جا پہنچی ہے۔ اس لیے کفار کا اس کلام کے بارے میں جھگڑنا معقولیت سے کوسوں دور ہے۔ اس کے بعد کفار کو خطاب فرمایا کہ جن عقائد اور نظریات پر تم پختگی سے چمٹے ہوئے ہو ان کی بنیاد وہم و گمان کے سوا کچھ نہیں، ان کی حقانیت ثابت کرنے کے لیے نہ تمہارے پاس کوئی عقلی دلیل ہے اور نہ نقلی دلیل ہے۔ تم اپنے نفس کی خواہشات سے اس مغلوب ہو کہ تمہارا نفس جو کہتا ہے، اسی کو حق یقین کر لیتے ہو۔ تم نے کبھی ان باتوں میں چھان بین کی ضرورت محسوس ہی نہیں کی تم خود سوچو کہ کیا ظن و تخمین میں اتنی طاقت ہے کہ وہ ٹھوس عقائد کو بدل ڈالیں؟ تمہارے کہنے سے نہ حق باطل بن جائے گا اور نہ وہ تمہارے انکار سے حق مٹ جائے گا۔ تمہاری سلامتی اسی میں ہے کہ تم نفس کی اندھی پیروی کو ترک کردو اور چشم حقیقت سے حق کے رخ زیبان کو دیکھو اور پہچانو۔

اس کے باوجود کفار اپنے آپ کو ہدایت یافتہ یقین کرتے تھے۔ وہ یہ سمجھتے تھے کہ جو لوگ ان کے راستے سے ہٹ گئے ہیں، وہ گمراہ ہیں۔ بتا دیا کہ اللہ تعالیٰ اس حقیقت کو بہتر جانتا ہے کہ کون کس حال میں ہے۔؟ کون گم کردہ راہ ہے؟ اور کس کے دل کو نورہدایت سے منور کر دیا گیا ہے؟

بعدازاں چند ایسے احکام کا ذکر کردیا جو قرآن کریم کے نزول سے ہزاروں سال پہلے نازل ہونے والے صحیفوں سے مندرج تھے جو حضرت ابراہیم اور موسیٰ علیھما السلام پر نازل ہوئے تاکہ اہل مکہ جنہیں ابراہیمی نسبت پر فخروناز ہے، انہیں معلوم ہو جائے کہ نبی کریم کوئی نیا دین اور زندگی کے لیے کوئی انوکھا نظام لے کر نہیں آئے، بلکہ یہ انہیں سچائیوں کی دعوت دے رہے ہیں جن کی دعوت پہلے انبیاء دیتے رہے ہیں، خصوصا حضرت ابراہیم خلیل اللہ جن کی تم اولاد ہو جن کے تعمیر کردہ کعبے کی مجاوری کے باعث تم جہاں جاتے، لوگ فرط عقیدت سے تمہاری راہ میں آنکھیں بچھاتے ہیں۔

آخر میں تنبیہہ فرما دی کہ ان سچائیوں کا انکار کرنے والے تم پہلے لوگ نہیں ہو، تم سے پیشتر بھی کئی بدنصیب قوموں نے ان کو ماننے سے انکار کیا۔ نتیجہ یہ نکلا کہ وہ تباہ کر دی گئیں۔ اگر تمہارا بھی یہی وتیرہ رہا تو سن لو اس کا نتیجہ بھی مختلف نہ ہوگا۔ اس نصحیت پر اس سورت کا اختتام ہو رہا ہے کہ اے مکہ کے باشندو، کلام الہی سن کر تم غرور نخوت سے اکڑے ہوئے بڑی بے پروائی سے گزرجاتے ہو۔ یہ مہلت کی گھڑیاں ختم ہونے والی ہیں۔ پھر واویلا کرنے سے کچھ حاصل نہ ہوگا۔ تمہاری نجات اسی میں ہے کہ تمام معبودلان باطل سے رشتہ توڑ کر اپنے حقیقی خالق اور سچے کی عبادت میں مصروف ہو جاؤ۔