تعارف سورۃ الطارق

اس سورۂ پاک کا نام ’الطارق‘ جو اس کی پہلی آیت سے ماخوذ ہے۔ اس میں ایک رکوع، ستر آیتیں، اکسٹھ کلمے اور دو سو انتالیس حروف ہیں۔

نزول

اس میں کوئی اختلاف نہیں کہ یہ سورہ مکہ مکرمہ میں نازل ہوئی۔

مضامین

اس سورہ میں بھی وقوع قیامت پر دلائل پیش کیے جارہے ہیں لیکن ان کے بیان سے پہلے قسمیں اٹھا کر یہ بتایا گیا ہے کہ انسان کو پیدا کرنے کے بعد اسے آوارہ نہیں چھوڑدیا گیا کہ اس کے دل میں جو آئے کرتا رہے اور اسے کسی باز پرس کا اندیشہ نہ ہو، کیونکہ یہ حکتم الٰہی کے خلاف ہے۔ اللہ تعالیٰ نے انسان کو گوناگوں صلاحیتوں سے مالا مال کر کے پیدا کیا ہے اور یہ دیکھنے کے لیے کہ وہ ان بخشی ہوئی نعمتوں کو کس طرح استعمال کرتا ہے۔ اس کے محافظ بھی مقرر کر دیے ہیں۔

قیامت کے منکرین کو بتایا جارہا ہے کہ میری قدرت کا انکار کرنے سے پہلے ذرا اپنی پیدائش پر غور تو کرو۔ تمہار مادۂ تخلیق پانی کی ایک بوند ہے۔ تمہاری چشم نرگسیں، چاند کی مانند چمکتا ہوا تمہاری چہرہ، تمہاری خوبصورت پیشانی، موتیوں کی طرح دمکتے ہوئے دانت، یہ قامت زیبا سب اسی ایک بوندے سنمو دار ہوئی ہے۔ پھر جسمانی قوتیں، ذہنی اور روحانی استعداد میں بھی اسی میں بڑی خوش اسلوبی سے سمٹی ہوئی تھیں۔ جس کی قدرت کا یہ حیرت انگیز شاہکار تمہاری آنکھوں کے سامنے ہے کیا وہ تمہیں مرنے کے بعد دوبارہ زندہ نہیں کرسکتا۔ کیا اس میں کسی شک کی گنجائش ہے؟ یا درکھو اگر تم راہ راست اختیار نہیں کر و گے تو اس دن تمہیں کوئی ایسا دوست اور مددگار نہیں ملے گا جو خداوند قہار کے عذاب سے تمہیں چھڑا سکے۔

سورہ کے اختتام سے پہلے صاف طور پر بتا دیا کہ اہل مکہ اسلام کو ناکام کرنے کے لیے سازشوں میں مصروف ہیں لیکن اللہ تعالیٰ بھی بےخبر نہیں وہ ان کی کارستانیوں کو خوب جانتا ہے اور وہ اپنی قدرت سے ان کے تمام منصوبوں کو ناکام بنا کر رکھ دے گا یہ کروفر، یہ شان وشوکت جو انہیں بد مست کیے ہوئے ہے، چند روزہ ہے۔ غور وتدبر کے لیے جو مہلت انہیں دی گئی ہے وہ جب اختتام پذیر ہوگی تو پھر غضب الٰہی کی بجلی کوندے گی اور انہیں خاک سیاہ بنا کر رکھ دے گی۔